Surah Al Imran Ayat 152 (3:152)

{و لقد صدقكم الله وعده: اور بیشک اللہ نے تمہیں اپنا وعدہ سچاکر دکھایا۔} یہاں غزوہ احد کی بات ہورہی ہے چنانچہ ارشاد فرمایا کہ’’بیشک اللہ عزوجل نے جنگ احد میں اپنا وعدہ پورا فرمادیا کہ’’و انتم الاعلون ان كنتم مؤمنین‘‘ یعنی تم ہی غالب ہوگے اگر تم سچے ایمان والے ہو۔تو تم غالب تھے اور اللہ تعالی کے حکم سے کافروں کو قتل کر رہے تھے لیکن جب تم نے بزدلی دکھائی اوررسول اللہ صلی اللہ تعالی علیہ والہ وسلم نے جو ایک پہاڑی درے پر جمے رہنے کا حکم دیا تھا اس میں اپس میں اختلاف کیا اوراس حکم میں رسول اللہ صلی اللہ تعالی علیہ والہ وسلم کی مخالفت کی حالانکہ اللہ تعالی تمہیں تمہاری پسندیدہ کامیابی دکھا چکا تھا لیکن تم میں سے بعض نے مال غنیمت حاصل کرنے کی خاطر دنیا طلبی کیلئے درہ چھوڑ دیا جس کا نتیجہ یہ نکلا کہ تمہیں بہت زیادہ نقصان اٹھانا پڑا۔ واقعے کا خلاصہ یہ ہے کہ کفار کی شکست کے بعد حضرت عبداللہ بن جبیر رضی اللہ تعالی عنہ کے ساتھ جو تیر انداز تھے وہ آپس میں کہنے لگے کہ مشرکین کو شکست ہوچکی ہے لہذا اب یہاں ٹھہر کر کیا کریں گے۔چلو کچھ مال غنیمت حاصل کرنے کی کوشش کریں۔ بعض حضرات نے یہ سن کر کہا کہ یہ جگہ مت چھوڑو کیونکہ رسول کریم صلی اللہ تعالی علیہ والہ وسلم نے تاکید کے ساتھ حکم فرمایاتھا کہ تم اپنی جگہ ٹھہرے رہنا اورکسی حال میں یہ جگہ نہ چھوڑنا جب تک میرا حکم نہ آجائے مگر لوگ غنیمت کے لئے چل پڑے اور حضرت عبداللہ بن جبیر رضی ا للہ تعالی عنہ کے ساتھ دس سے کم صحابہ کرام رضی اللہ تعالی عنہم رہ گئے۔(خازن ال عمران تحت الایۃ: ۱۵۲ ۱ / ۳۱۱) دنیا طلب کرنے والوں سے مرادوہ لوگ ہیں جنہوں نے وہ درہ چھوڑ دیا اورمال غنیمت حاصل کرنے میں مشغول ہوگئے اور اخرت کے طلبگاروں سے مراد وہ لوگ ہیں جو اپنے امیر حضرت عبداللہ بن جبیر رضی اللہ تعالی عنہ کے ساتھ اپنی جگہ پر قائم رہے حتی کہ شہید ہوگئے ۔ایت کے اخر میں فرمایا کہ غزوہ احد میں اس مقام پر جن لوگوں نے خطا کی اللہ تعالی نے انہیں معاف فرمادیا۔ لہذا یاد رہے کہ جو اس طرح کے واقعات کو لے کر صحابہ کرام رضی ا للہ تعالی عنہم کی شان میں گستاخی کرے وہ بدبخت ہے کہ ان کی معافی کا اعلان رب العالمین عزوجل خودفرماچکا۔