Surah An Nisa Ayat 136 (4:136)

{امنوا بالله و رسوله: اللہ اور اس کے رسول پرایمان رکھو۔} یہاں اہل ایمان کو مخاطب کرکے فرمایا ’’امنوا‘‘ ’’ایمان لاو‘‘ اگر یہ خطاب حقیقی مسلمانوں کو ہے تو اس کا معنی ہوگا کہ ایمان پر ثابت قدم رہو ۔اور اگر یہ خطاب یہود و نصاری سے ہو تو معنی یہ ہوں گے کہ اے بعض کتابوں اور بعض رسولوں پر ایمان لانے والو! تم مکمل ایمان لاو یعنی تمام کتابوں اور تمام رسولوں پر جن میں قران اور محمد مصطفی صلی اللہ تعالی علیہ والہ وسلم بھی داخل ہیں۔ اور اگر یہ خطاب منافقین سے ہو تو اس کے معنی یہ ہوں گے کہ اے ایمان کا ظاہری دعوی کرنے والو ! اخلاص کے ساتھ ایمان لے آو ۔ یہاں جو فرمایا گیا کہ رسول اور کتاب پر ایمان لاو تو رسول سے سید الانبیاء صلی اللہ تعالی علیہ والہ وسلم اور کتاب سے قرآن پاک مراد ہے۔ یہاں یہ بات یاد رہے کہ اہل ایمان کا لفظ حقیقی معنی کے اعتبار سے موجودہ زمانے میں صرف مسلمانوں پر بولا جاسکتا ہے کسی اور مذہب والے پر خواہ وہ یہودی ہو یا عیسائی اس لفظ کو نہیں بول سکتے۔ ایت میں فرمایا گیا ہے کہ تم اللہ عزوجل پر اور اس کے رسول محمد مصطفی صلی اللہ تعالی علیہ والہ وسلم پر اور قرآن پر اور اس سے پہلی ہر کتاب اور رسول پر ایمان لاو۔ اس سے معلوم ہوا کہ تمام کتابوں پر ایمان لانا ضروری ہے مگر عمل صرف قران شریف پر ہی ہوگا۔ ان کتابوں کے متعلق یہ عقیدہ رکھنا چاہیے کہ یہ اللہ عزوجل کی بھیجی ہوئی کتابیں ہیں۔