اللہ کے نام سے شروع جو نہایت مہربان ، رحمت والاہے ۔

بکھیر کر اڑادینے والیوں کی قسم۔

پھر بوجھ اٹھانے والیوں کی۔

پھر آسانی سے چلنے والیوں کی۔

پھر حکم کو تقسیم کرنے والیوں کی۔

بیشک جس کی تمہیں وعید سنائی جا رہی ہے وہ ضرور سچ ہے۔

اور بیشک بدلہ دیا جانا ضرور واقع ہونے والا ہے۔

راستوں والے آسمان کی قسم۔

تم طرح طرح کی بات میں ہو۔

اس قرآن سے وہی اوندھا کیا جاتا ہے جو اوندھا ہی کردیا گیا ہو۔

جھوٹے اندازے لگانے والے مارے جائیں۔

جو نشے میں بھولے ہوئے ہیں ۔

۔ پوچھتے ہیں کہ بدلے کا دن کب ہوگا؟

۔ (یہ اس دن واقع ہوگا) جس دن وہ آگ پر تپائے جائیں گے۔

اور (فرمایا جائے گا) اپنا عذاب چکھو، یہ وہی عذاب ہے جس کی تم جلدی مچاتے تھے۔

بیشک پرہیزگارلوگ باغوں اور چشموں میں ہوں گے۔

اپنے رب کی عطائیں لیتے ہوئے، بیشک وہ اس سے پہلے نیکیاں کرنے والے تھے۔

وہ رات میں کم سویا کرتے تھے۔

اور رات کے آخری پہروں میں بخشش مانگتے تھے۔

اور ان کے مالوں میں مانگنے والے اور محروم کا حق تھا۔

اور زمین میں یقین والوں کیلئے نشانیاں ہیں ۔

اور خود تمہاری ذاتوں میں ،تو کیا تم دیکھتے نہیں ؟

اور آسمان میں تمہارا رزق ہے اور وہ جس کا تم سے وعدہ کیا جاتا ہے۔

تو آسمان اور زمین کے رب کی قسم! بیشک یہ حق ہے ویسی ہی زبان میں جو تم بولتے ہو۔

اے حبیب!کیا تمہارے پاس ابراہیم کے معزز مہمانوں کی خبر آئی۔

جب وہ اس کے پاس آئے تو کہا: سلام، (ابراہیم نے) فرمایا، ’’سلام ‘‘اجنبی لوگ ہیں ۔

پھر ابراہیم اپنے گھر والوں کی طرف گئے تو ایک موٹا تازہ بچھڑا لے آئے۔

پھر اسے ان کے پاس رکھ دیا تو فرمایا: کیا تم کھاتے نہیں ؟

تو اپنے دل میں ان سے خوف محسوس کیا، (فرشتوں نے) عرض کی: آپ نہ ڈریں اور انہوں نے اسے ایک علم والے لڑکے کی خوشخبری سنائی۔

تو ابراہیم کی بیوی چلاتی ہوئی آئی پھر اپنے چہرے پر ہاتھ مارا اورکہا:کیا بوڑھی بانجھ عورت (بچہ جنے گی۔).

فرشتوں نے کہا: تمہارے رب نے یونہی فرمایا ہے، بیشک وہی حکمت والا، علم والا ہے۔

ابراہیم نے فرمایا: تو اے بھیجے ہوئے فرشتو!پھر تمہارا کیا مقصد ہے؟

انہوں نے کہا:بیشک ہم ایک مجرم قوم کی طرف بھیجے گئے ہیں۔

تاکہ ان پر گارے کے پتھر برسائیں ۔

جن پر تمہارے رب کے پاس حد سے بڑھنے والوں کے لیے نشان لگائے ہوئے ہیں۔

تو ہم نے اس شہر میں موجود ایمان والوں کو نکال لیا۔

تو ہم نے وہاں ایک ہی گھر مسلمان پایا۔

اور ہم نے اس میں ان لوگوں کے لیے نشانی باقی رکھی جو دردناک عذاب سے ڈرتے ہیں۔

اور موسیٰ میں (بھی نشانی ہے) جب ہم نے اسے روشن سند کے ساتھ فرعون کی طرف بھیجا۔

اور وہ (فرعون) اپنے لشکر سمیت پھر گیا اور بولا: (موسیٰ تو) جادوگر ہے یا دیوانہ۔

اور ہم نے فرعون اور اس کے لشکر کو پکڑ کر دریا میں ڈال دیا اس حال میں کہ وہ (خود کو) کو ملامت کررہا تھا۔

اور قومِ عاد میں (بھی نشانی ہے) جب ہم نے ان پرخشک آندھی بھیجی۔

وہ جس چیز پر گزرتی تھی اسے گلی ہوئی چیز کی طرح کرچھوڑتی ۔

اور ثمود میں ( نشانی ہے) جب ان سے فرمایا گیا: ایک وقت تک فائدہ اٹھالو۔

تو انہوں نے اپنے رب کے حکم سے سرکشی کی تو ان کی آنکھوں کے سامنے انہیں کڑک نے آلیا۔

تو وہ نہ کھڑے ہوسکے اور نہ وہ بدلہ لے سکتے تھے۔

اور ان سے پہلے قوم نوح کو ہلاک فرمایا، بیشک وہ فاسق لوگ تھے۔

اور آسمان کو ہم نے (اپنی) قدرت سے بنایا اور بیشک ہم وسعت وقدرت والے ہیں ۔

اور زمین کو ہم نے فرش بنایا تو ہم کیا ہی اچھا بچھانے والے ہیں۔

اور ہم نے ہر چیز کی دو قسمیں بنائیں تا کہ تم نصیحت حاصل کرو۔

اور اللہ کی طرف بھاگو بیشک میں اس کی طرف سے تمہارے لئے کھلم کھلاڈر سنانے والا ہوں ۔

اور اللہ کے ساتھ کوئی دوسرا معبود نہ ٹھہراؤ بیشک میں اس کی طرف سے تمہارے لیے کھلم کھلا ڈر سنانے والا ہوں ۔

یونہی جب ان سے پہلے لوگوں کے پاس کوئی رسول تشریف لایا تو وہ یہی بولے کہ (یہ) جادوگر ہے یا دیوانہ۔

کیاانہوں نے ایک دوسرے کو اس بات کی وصیت کی تھی بلکہ وہ سرکش لوگ ہیں ۔

تو اے حبیب!تم ان سے منہ پھیر لو تو تم پر کوئی ملامت نہیں ۔

اور سمجھاؤ کہ سمجھانا ایمان والوں کو فائدہ دیتا ہے۔

اور میں نے جن اور آدمی اسی لئے بنائے کہ میری عبادت کریں۔

میں ان سے کچھ رزق نہیں مانگتا اور نہ یہ چاہتا ہوں کہ وہ مجھے کھانا دیں۔

بیشک اللہ ہی بڑا رزق دینے والا، قوت والا، قدرت والا ہے۔

تو بیشک ان ظالموں کے لیے عذاب کا ایک حصہ ہے جیسے ان کے ساتھیوں کے عذاب کا حصہ تھا تو یہ مجھ سے (عذاب مانگنے میں ) جلدی نہ کریں ۔

تو کافروں کیلئے ان کے اس دن سے خرابی ہے جس کی انہیں وعید سنائی جاتی ہے۔