Surah Al Anam Ayat 91 (6:91)

{ و ما قدروا الله حق قدره:اور یہودیوں نے اللہ کی قدر نہ کی جیسا اس کی قدر کرنے کا حق تھا۔} اس ایت کا شان نزول یہ ہے کہ یہودیوں کی ایک جماعت اپنے حبرالاحبار یعنی سب سے بڑے عالم مالک ابن صیف کو لے کرنبی کریم صلی اللہ تعالی علیہ والہ وسلم سے بحث کرنے آئی۔ تاجدار رسالت صلی اللہ تعالی علیہ والہ وسلم نے اس سے فرمایا میں تجھے اس پر وردگار کی قسم دیتا ہوں جس نے حضرت موسی علیہ الصلوۃ والسلام پر توریت نازل فرمائی کیا توریت میں تو نے یہ دیکھا ہے ’’ ان اللہ یبغض الحبر السمین‘‘ یعنی اللہ عزوجل کو موٹا عالم ناپسند ہے۔ وہ کہنے لگا ’’ہاں یہ توریت میں ہے‘‘۔ حضور اقدس صلی اللہ تعالی علیہ والہ وسلم نے فرمایا:’’ تو موٹا عالم ہی تو ہے ۔اس پروہ غضبناک ہو کر کہنے لگاکہ اللہ عزوجل نے کسی ادمی پر کچھ نہیں اتارا۔اس پر یہ ایت کریمہ نازل ہوئی اور اس میں فرمایا گیا : وہ کتاب کس نے اتاری جو موسی لائے تھے تو وہ لاجواب ہوگیا اور یہودی اس پر برہم ہوگئے اور اس کو جھڑکنے لگے اور اس کو اس کے عہدے سے معزول کردیا۔ (تفسیر بغوی الانعام تحت الایۃ: ۹۱ ۲ / ۹۴ مدارک الانعام تحت الایۃ: ۹۱ ص۳۳۱-۳۳۲ ملتقطا) مفتی احمد یار خان نعیمی رحمۃاللہ تعالی علیہ فرماتے ہیں کہ خیال رہے کہ موٹے پادری سے مراد وہ پادری تھے جو حرام خوری کرکے خوب موٹے تازے ہو جاتے تھے۔ اس ایت کا خلاصہ یہ ہے کہ یہودیوں نے اللہ عزوجل کی ویسی قدر نہ کی جیسا اس کی قدر کرنے کا حق تھا اور اس کی معرفت سے محروم رہے اور بندوں پر اللہ تعالی کے رحم و کرم کو نہ جانا۔ انہوں نے کہا : اللہ عزوجل نے کسی انسان پر کوئی چیز نہیں نازل کی۔ اے حبیب !صلی اللہ تعالی علیہ والہ وسلم تم انہیں جواب دو کہ اگراللہ عزوجل نے کوئی کتاب نہیں اتاری تو وہ کتاب کس نے اتاری تھی جسے حضرت موسی علیہ الصلوۃ والسلام لے کر ائے تھے جو سراپا نور اور لوگوں کے لیے ہدایت تھی اور جس کے تم نے الگ الگ کاغذ بنالیے تھے اور ان میں سے کچھ کو ظاہر کرتے ہو جس کا اظہار اپنی خواہش کے مطابق سمجھتے ہو جبکہ محمد مصطفی صلی اللہ تعالی علیہ والہ وسلم اور ان کے دین کے بارے میں بہت کچھ چھپالیتے ہو اور اے یہودیو! تمہیں محمد مصطفی صلی اللہ تعالی علیہ والہ وسلم کی تعلیم اور قرآن کریم کے ذریعے وہ کچھ سکھایا جاتا ہے جو نہ تم کو معلوم تھا اور نہ تمہارے باپ دادا کو۔ مزید فرمایا کہ پھر یہودی اگر اپ صلی اللہ تعالی علیہ والہ وسلم کے سوال کا جواب نہ دے سکیں توتم خود جواب دے دینا کہ تورات کو اللہ عزوجل نے نازل کیا تھا اور جیسے تورات کو اللہ عزوجل نے نازل فرمایا تھا ایسے ہی قران کو بھی اللہ عزوجل نے ہی نازل فرمایا ہے اوریہ جواب دینے کے بعد انہیں ان کی بیہودگی میں کھیلتے ہوئے چھوڑ دو کیونکہ جب آپ صلی اللہ تعالی علیہ والہ وسلم نے حجت قائم کردی اور وعظ و نصیحت کا حق ادا کردیا اور ان کے لئے کسی عذر اور بہانے کی گنجائش نہ چھوڑی اوراس پر بھی وہ باز نہ آئیں تو انہیں ان کی بے ہودگی میں چھوڑ دیں۔یہ کفار کے حق میں وعید و تہدید ہے۔