اللہ کے نام سے شروع جو نہایت مہربان ، رحمت والاہے ۔

نٓ، قلم اور اس کی قسم جو لکھتے ہیں۔

تم اپنے رب کے فضل سے ہر گز مجنون نہیں ہو۔

اور یقینا تمہارے لیے ضرور بے انتہا ثواب ہے۔

اور بیشک تم یقینا عظیم اخلاق پر ہو۔

تو جلد ہی تم بھی دیکھ لو گے اور وہ بھی دیکھ لیں گے۔

کہ تم میں کون مجنون تھا۔

بیشک تمہارا رب ہی خوب جانتا ہے اسے جو اس کی راہ سے بہکا اور وہ ہدایت والوں کو بھی خوب جانتا ہے۔

تو تم جھٹلانے والوں کی بات نہ سننا۔

انہوں نے تو یہی خواہش رکھی کہ کسی طرح تم نرمی کرو تو وہ بھی نرم پڑجائیں۔

اور ہر ایسے آدمی کی بات نہ سننا جو بڑا قسمیں کھانے والا، ذلیل۔

سامنے سامنے بہت طعنے دینے والا، چغلی کے ساتھ ادھر ادھر بہت پھرنے والا۔

بھلائی سے بڑا روکنے والا، حد سے بڑھنے والا،بڑا گناہگار۔

سخت مزاج، اس کے بعد ناجائز پیداوار ہے۔

اس بنا پر (بات نہ مانو) کہ وہ مال اور بیٹوں والا ہے۔

جب اس پر ہماری آیتیں پڑھی جاتی ہیں تو کہتا ہے کہ اگلوں کی کہانیاں ہیں ۔

قریب ہے کہ ہم اس کی سور کی سی تھوتھنی پر داغ دیں گے۔

بیشک ہم نے انہیں جانچا جیسا باغ والوں کو جانچا تھا جب انہوں نے قسم کھائی کہ ضرور صبح ہوتے اس باغ کو کاٹ لیں گے۔

اور اِنْ شَآءَ اللہ نہیں کہہ رہے تھے۔

تو اس باغ پر تیرے رب کی طرف سے ایک پھیری کرنے والا پھیری کر گیا جبکہ وہ سو رہے تھے۔

تو صبح کے وقت وہ باغ سیاہ رات کی طرح ہوگیا۔

پھر انہوں نے صبح ہوتے ایک دوسرے کو پکارا۔

کہ اگر تم کاٹنا چاہتے ہو تو صبح سویرے اپنی کھیتی پر چلو۔

تو وہ چلے اور آپس میں آہستہ آہستہ کہتے جاتے تھے۔

کہ ہرگز آج کوئی مسکین تمہارے پاس باغ میں آنے نہ پائے۔

اور وہ خود کو روکنے پر قادرسمجھتے ہوئے صبح سویرے چلے۔

پھر جب انہوں نے اس باغ کو دیکھا توکہنے لگے:بیشک ہم ضرور راستہ بھٹک گئے ہیں ۔

بلکہ ہم محروم ہوگئے ہیں۔

ان میں جو بہتر تھا اس نے کہا: کیا میں تم سے نہیں کہتا تھا کہ تم تسبیح کیوں نہیں کرتے؟

انہوں نے کہا: ہمارا رب پاک ہے، بیشک ہم ظالم تھے۔

پھر وہ ایک دوسرے کی طرف ملامت کرتے متوجہ ہوئے۔

بولے: ہائے ہماری خرابی، بیشک ہم سرکش تھے۔

امید ہے کہ ہمارا رب ہمیں اس سے بہتر بدل دے یقینا(اب) ہم اپنے رب کی طرف ہی رغبت رکھنے والے ہیں ۔

سزا ایسی ہی ہوتی ہے اور بیشک آخرت کی سزا سب سے بڑی ہے۔ کیا ہی اچھا ہوتا اگر لوگ جانتے۔

بیشک ڈر والوں کے لیے ان کے رب کے پاس چین کے باغ ہیں ۔

توکیا ہم مسلمانوں کو مجرموں جیسا کردیں ۔

تمہیں کیا ہوا؟ کیسا حکم لگاتے ہو؟

کیا تمہارے لیے کوئی کتاب ہے جس میں تم (ایسی بات)پڑھتے ہو۔

کہ تمہارے لیے قیامت کے دن میں ضروروہ سب کچھ ہے جو تم پسند کرو۔

یا تمہارے لیے ہم پر قیامت کے دن تک پہنچتی ہوئی کچھ قسمیں ہیں کہ ضرور تمہیں وہی کچھ ملے گا جو تم فیصلہ کرو گے۔

تم ان سے پوچھو کہ ان میں کون اس کا ضامن ہے؟

یا ان کیلئے کچھ شریک ہیں تو وہ اپنے شریکوں کو لے آئیں اگر سچے ہیں ۔

جس دن معاملہ بڑا سخت ہوجائے گا اور کافروں کوسجدے کی طرف بلایا جائے گا تو وہ (اس کی) طاقت نہ رکھیں گے۔

ان کی نگاہیں نیچی ہوں گی ،ان پر ذلت چڑھ رہی ہوگی اوربیشک انہیں (دنیا میں ) سجدے کی طرف بلایا جاتا تھا جبکہ وہ تندرست تھے۔

تو جو اس بات کو جھٹلاتا ہے اسے مجھ پر چھوڑ دو عنقریب ہم انہیں آہستہ آہستہ وہاں سے لے جائیں گے جہاں سے انہیں خبر بھی نہ ہوگی۔

اور میں انہیں ڈھیل دوں گا، بیشک میری خفیہ تدبیر بہت پکی ہے۔

یا کیا تم ان سے اجرت مانگتے ہو کہ وہ تاوان کے بوجھ میں دبے ہوئے ہیں ۔

یا ان کے پاس غیب کا علم ہے کہ وہ لکھ رہے ہیں ۔

تو تم اپنے رب کے حکم تک صبرکر و اور مچھلی والے کی طرح نہ ہونا جب اس نے اس حال میں پکارا کہ وہ بہت غمگین تھا۔

اگر اس کے رب کی نعمت اسے نہ پالیتی تو وہ ضرور چٹیل میدان میں پھینک دیا جاتااور وہ ملامت کیا ہوا ہوتا۔

تو اسے اس کے رب نے چن لیا اور اپنے قربِ خاص کے حقداروں میں کرلیا۔

اوربیشک کافر جب قرآن سنتے ہیں تو ایسے معلوم ہوتا ہے کہ گویا اپنی آنکھوں سے نظر لگا کر تمہیں ضرورگرادیں گے اور وہ کہتے ہیں :یہ ضرور عقل سے دور ہیں ۔

حالانکہ وہ تو تمام جہانوں کے لیے نصیحت ہی ہیں ۔