اللہ کے نام سے شروع جو نہایت مہربان ، رحمت والاہے ۔

یقینی طور پر واقع ہونے والی۔

یقینی طور پر واقع ہونے والی کیا ہے؟

اور تمہیں کیا معلوم کہ وہ یقینی طور پر واقع ہونے والی کیا ہے؟

ثمود اور عاد نے دلوں کو دہلادینے والی کو جھٹلایا۔

تو قومِ ثمود کے لوگ تو حد سے گزری ہوئی چنگھاڑ سے ہلاک کئے گئے۔

اور عادکے لوگ تو وہ نہایت سخت گرجتی آندھی سے ہلاک کیے گئے ۔

اللہ نے وہ آندھی ان پرلگاتارسات راتیں اور آٹھ دن پوری قوت کے ساتھ مسلط کردی تو تم ان لوگوں کو ان دنوں اور راتوں میں یوں پچھاڑے ہوئے دیکھتے گویا کہ وہ گری ہوئی کھجوروں کے سوکھے تنے ہیں ۔

تو کیا تم ان میں کسی کو بچا ہوا دیکھتے ہو؟

اور فرعون اور اس سے پہلے والے اور الٹنے والی بستیوں نے خطاؤں کا ارتکاب کیا ۔

تو انہوں نے اپنے رب کے رسول کا حکم نہ مانا تو اللہ نے انہیں زیادہ سخت گرفت سے پکڑلیا۔

بیشک جب پانی نے سر اٹھایا تھاتوہم نے تمہیں کشتی میں سوار کیا۔

تاکہ اسے تمہارے لیے یادگار بنادیں اور سن کر یاد رکھنے والے کان اس واقعہ کو یاد رکھیں۔

پھرجب صور میں (پہلی مرتبہ) ایک پھونک ماری جائے گی۔

اور زمین اور پہاڑ اٹھا کر ایک دم چورا چوراکردئیے جائیں گے۔

تو اس دن واقع ہونے والی واقع ہوجائے گی۔

اور آسمان پھٹ جائے گا تو اس دن وہ بہت کمزورہوگا۔

اور فرشتے اس کے کناروں پر (کھڑے) ہوں گے اور اس دن آٹھ فرشتے تمہارے رب کا عرش اپنے اوپر اٹھائیں گے۔

اس دن تم سب اس حال میں پیش کئے جاؤ گے کہ تم میں سے کسی کی کوئی پوشیدہ حالت چھپ نہ سکے گی۔

تو بہر حال جسے اس کا نامہ اعمال اس کے دائیں ہاتھ میں دیا جائے گا تو وہ کہے گا: لو میرا نامۂ اعمال پڑھ لو۔

بیشک مجھے یقین تھا کہ میں اپنے حساب کو ملنے والا ہوں ۔

تو وہ پسندیدہ زندگی میں ہوگا۔

بلند باغ میں ۔

اس کے پھل قریب ہوں گے۔

(کہا جائے گا:) گزرے ہوئے دنوں میں جو تم نے آگے بھیجا اس کے بدلے میں خوشگواری کے ساتھ کھاؤ اور پیو۔

اوررہا وہ جسے اس کانامہ اعمال ا س کے بائیں ہاتھ میں دیا جائے گا تو وہ کہے گا: اے کاش کہ مجھے میرا نامہ اعمال نہ دیا جاتا۔

اور میں نہ جانتا کہ میرا حساب کیا ہے۔

اے کاش کہ دنیا کی موت ہی (میرا کام) تمام کردینے والی ہوجاتی۔

میرا مال میرے کچھ کام نہ آیا۔

میرا سب زور جاتا رہا۔

(فرشتوں کو حکم ہوگا) اسے پکڑو پھر اسے طوق ڈالو۔

پھر اسے بھڑکتی آگ میں داخل کرو۔

پھر ایسی زنجیر میں جکڑ دو جس کی لمبائی ستر ہاتھ ہے۔

بیشک وہ عظمت والے اللہ پر ایمان نہ لاتا تھا۔

اور مسکین کو کھانا دینے کی ترغیب نہیں دیتا تھا۔

تو آج یہاں اس کا کوئی دوست نہیں ۔

اور نہ دوزخیوں کے پیپ کے سوا کچھ کھانے کو ہے۔

اسے خطاکار لوگ ہی کھائیں گے۔

تو مجھے ان چیزوں کی قسم ہے جنہیں تم دیکھتے ہو۔

اور ان چیزوں کی جنہیں تم نہیں دیکھتے۔

بیشک یہ قرآن ضرور ایک معزز رسول سے باتیں ہیں ۔

اور وہ کسی شاعر کی بات نہیں ہے۔تم بہت کم یقین رکھتے ہو۔

اور نہ کسی کاہن کی بات ہے ۔ تم بہت کم نصیحت مانتے ہو۔

یہ قرآن سارے جہانوں کے رب کی طرف سے اتارا ہواہے۔

اور اگر وہ ایک بات بھی خود بنا کر ہمارے اوپر لگا دیتے ۔

توضرور ہم ان سے قوت کے ساتھ بدلہ لیتے۔

پھر ان کی دل کی رگ کاٹ دیتے۔

پھر تم میں کوئی ان سے روکنے والا نہ ہوتا۔

اور بیشک یہ قرآن ڈر والوں کے لئے ضرور نصیحت ہے۔

اوربیشک ضرور ہم جانتے ہیں کہ تم میں سے کچھ جھٹلانے والے ہیں ۔

اور بیشک وہ کافروں پر ضرور حسرت ہے۔

اور بیشک وہ ضروریقینی حق ہے۔

تو (اے محبوب!)تم اپنے عظمت والے رب کے نام کی پاکی بیان کرو۔