Surah At Taubah Ayat 118 (9:118)

{و على الثلثة:اور تین پر۔} یہ تین صحابہ کرام حضرت کعب بن مالک ہلال بن امیہ اور مرارہ بن ربیع رضی اللہ تعالی عنہم ہیں۔ ان کا ذکر آیت ’’و اخرون مرجون لامر الله(توبہ:۱۰۶)(اور اللہ کے حکم کی وجہ سے کچھ دوسروں کو موخر کردیا گیا ہے) ‘‘ میں گزر چکا ہے یہ سب انصاری تھے رسول کریم صلی اللہ تعالی علیہ والہ وسلم نے غزوہ تبوک سے واپس ہو کر ان سے جہاد میں حاضر نہ ہونے کی وجہ دریافت فرمائی اور فرمایا: ٹھہرو جب تک اللہ تعالی تمہارے لئے کوئی فیصلہ فرمائے اور مسلمانوں کو ان لوگوں سے ملنے جلنے کلام کرنے سے ممانعت فرما دی حتی کہ ان کے رشتہ داروں اور دوستوں نے ان سے کلام ترک کردیا یہاں تک کہ ایسا معلو م ہوتا تھا کہ ان کو کوئی پہچانتا ہی نہیں اور ان کی کسی سے شناسائی ہی نہیں۔ اس حال پر انہیں پچاس روز گزرے یہاں تک کہ جب زمین اپنی وسعت کے باوجود ان پر تنگ ہوگئی اور انہیں کوئی ایسی جگہ نہ مل سکی جہاں ایک لمحہ کے لئے انہیں قرار ہوتا ہر وقت پریشانی اور رنج وغم بے چینی و اضطراب میں مبتلا تھے اور وہ رنج وغم کی شدت کی وجہ سے اپنی جانوں سے تنگ اگئے نہ کوئی انیس ہے جس سے بات کریں نہ کوئی غم خوار جسے حال دل سنائیں وحشت و تنہائی ہے اور شب و روز کی گریہ و زاری۔ انہوں نے یقین کرلیا کہ اللہ عزوجل کی ناراضگی سے بچنے کیلئے اس کے سوا کوئی پناہ نہیں تواللہ تعالی نے ان پر رحم فرمایا اور ان کی توبہ قبول فرما لی تا کہ ائندہ توبہ کرنے والے ہی رہیں۔ (خازن التوبۃ تحت الایۃ: ۱۱۸ ۲ / ۲۹۰-۲۹۱ ملخصا)