Surah Yunus Ayat 65 (10:65)

{و لا یحزنك قولهم:اور تم ان کی باتو ں کا غم نہ کرو۔} اس ایت میں سرور دو عالم صلی اللہ تعالی علیہ والہ وسلم کو تسلی دی گئی ہے کہ کفار نابکار جو آپ کی تکذیب کرتے ہیں اور آپ کے خلاف برے مشورے کرتے ہیں آپ اس کا کچھ غم نہ فرمائیں۔ بیشک تمام عزتوں کا مالک اللہ عزوجل ہے وہ جسے چاہے عزت دے اور جسے چاہے ذلیل کرے اے سید انبیاء! صلی اللہ تعالی علیہ والہ وسلم اللہ عزوجل آپ کا ناصر و مددگار ہے اس نے آپ کو اور آپ کے صدقے میں آپ کے فرمانبرداروں کو عزت دی جیسا کہ دوسری آیت میں فرمایا کہ ’’و لله العزة و لرسوله و للمؤمنین ‘‘ (منافقون:۸) ترجمہ کنزالعرفان:اللہ کے لئے عزت ہے اور اس کے رسول کے لئے اور ایمانداروں کے لئے۔( خازن یونس تحت الایۃ: ۶۵ ۲ / ۳۲۴ ملخصا) بلکہ کائنات میں عزت کا پیمانہ ہی حضور پرنور صلی اللہ تعالی علیہ والہ وسلم کی ذات مبارکہ ہے جو اپ سے جتنا قریب ہے وہ اتنا ہی زیادہ معزز ہے چنانچہ صدیق اکبر رضی اللہ تعالی عنہ سب سے زیادہ قریب تھے تو امت میں سب سے معزز بھی وہی ہیں اور ابوجہل سب سے زیادہ دور تھا اس لئے کفار میں سب سے خبیث ترین بھی وہی قرار پایا۔