Surah An Nahl Ayat 97 (16:97)

{من عمل صالحا من ذكر او انثى و هو مؤمن:جو مرد یا عورت نیک عمل کرے اور وہ مسلمان ہو۔} ایت کا خلاصہ یہ ہے کہ جو مرد یا عورت نیک عمل کرے اور وہ مسلمان ہو تو ہم ضرور اسے دنیا میں حلال رزق اور قناعت عطا فرما کر اور آخرت میں جنت کی نعمتیں دے کرپاکیزہ زندگی دیں گے۔ بعض علماء نے فرمایا کہ اچھی زندگی سے عبادت کی لذت مراد ہے ۔ حکمت :مومن اگرچہ فقیر بھی ہو اس کی زندگانی دولت مند کافر کے عیش سے بہتر اور پاکیزہ ہے کیونکہ مومن جانتا ہے کہ اس کی روزی اللہ عزوجل کی طرف سے ہے جو اس نے مقدر کیا اس پر راضی ہوتا ہے اور مومن کا دل حرص کی پریشانیوں سے محفوظ اور آرام میں رہتا ہے اور کافر جو اللہ عزوجل پر نظرنہیں رکھتا وہ حریص رہتا ہے اور ہمیشہ رنج مشقت اور تحصیل مال کی فکر میں پریشان رہتا ہے۔ اس ایت سے معلوم ہوا کہ نیک اعمال پر ثواب ملنے کے لئے مسلمان ہونا شرط ہے کافر کے تمام نیک اعمال بیکار ہیں ۔( خازن النحل تحت الایۃ: ۹۷ ۳ / ۱۴۱-۱۴۲ ملخصا)