Surah Al Baqarah Ayat 116 (2:116)

{سبحنه: اللہ پاک ہے۔} یہودیوں نے حضرت عزیرعلیہ الصلوۃ والسلام کو اور عیسائیوں نے حضرت عیسی علیہ الصلوۃ والسلام کو خدا کا بیٹا ماناجبکہ مشرکین عرب نے فرشتوں کو خدا کی بیٹیاں قرار دیاجیسا کہ تینوں چیزیں قران پاک میں مذکور ہیں۔ ان سب کے رد میں یہ آیت نازل ہوئی۔ {له ما فی السموت: اسی کا ہے جو اسمانوں میں ہے۔} کسی کی اولاد اس کی ملکیت نہیں ہوسکتی اور جب اسمانوں اور زمین کی ہر چیز اللہ تعالی کی ملکیت ہے تو اس کی اولاد کیسے ہوسکتی ہے نیزاولاد حقیقت میں ماں باپ کا جز ہوتی ہے اور ادمی اپنے جز کا مالک نہیں ہوتا۔