Surah Al Baqarah Ayat 133 (2:133)

{ام كنتم شهدآء: کیا تم موجود تھے} یہ آیت یہودیوں کے حق میں نازل ہوئی انہوں نے کہا تھا کہ حضرت یعقوب علیہ الصلوۃ والسلام نے اپنی وفات کے روز اپنی اولاد کو یہودی رہنے کی وصیت کی تھی اللہ تعالی نے ان کے اس بہتان کے رد میں یہ آیت نازل فرمائی ۔(خازن البقرۃ تحت الایۃ: ۱۳۳ ۱ / ۹۳) ایت کے معنی یہ ہیں کہ اے بنی اسرائیل !کیا تمہارے پہلے لوگ حضرت یعقوب علیہ الصلوۃ والسلام کے آخری وقت ان کے پاس موجود تھے جس وقت انہوں نے اپنے بیٹوں کو بلا کر ان سے اسلام و توحید کا اقرا رلیا تھا اور یہ اقرار لیا تھا جو آیت میں مذکور ہے۔ {و اله ابآىك: اور تمہارے باپ دادا کے معبود۔} حضرت اسمعیل علیہ الصلوۃ والسلام کو حضرت یعقوب علیہ الصلوۃ والسلام کے آباء یعنی باپوں میں داخل کیا حالانکہ اپ علیہ الصلوۃ والسلام حضرت یعقوب علیہ الصلوۃ والسلام کے حقیقی والد نہ تھے۔ یہ اس لیے ہے کہ آپ علیہ الصلوۃ والسلام ان کے چچا ہیں اور چچا بمنزلہ باپ کے ہوتا ہے جیسا کہ حدیث شریف میں ہے اور آپ علیہ الصلوۃ والسلام کا نام حضرت اسحاق علیہ الصلوۃ والسلام سے پہلے ذکر فرمانا دووجہ سے ہے ایک تو یہ کہ آپ حضرت اسحاق علیہ الصلوۃ والسلام سے چودہ سال بڑے ہیں دوسرا اس لیے کہ آپ سید عالم صلی اللہ تعالی علیہ والہ وسلم کے اباء میں سے ہیں۔