Surah Al Baqarah Ayat 246 (2:246)

{الم تر الى الملا من بنی اسرآءیل: اے حبیب!کیا تم نے بنی اسرائیل کے ایک گروہ کو نہ دیکھا ۔} جہاد کا حکم دینے کے بعد اب جہاد کا ہمت و حوصلہ پیدا کرنے والا ایک واقعہ بہت سی دلچسپ تفصیلات کے ساتھ پیش کیا جا رہا ہے۔ چنانچہ بتایا گیا کہ حضرت موسی علیہ الصلوۃ والسلام کے بعد جب بنی اسرائیل کی اعتقادی اور عملی حالت نہایت خراب ہوگئی اور انہوں نے عہد ا لہی کو فراموش کردیا بت پرستی میں مبتلا ہوگئے اور سرکشی اور بد افعالی انتہا کو پہنچ گئی تو ان پر قوم جالوت مسلط کردی گئی جس کو عمالقہ کہتے ہیں۔جالوت ایک نہایت جابر بادشاہ تھا اس کی قوم کے لوگ مصراور فلسطین کے درمیان بحر روم کے ساحل پر رہتے تھے انہوں نے بنی اسرائیل کے شہر چھین لیے ان کے لوگ گرفتار کرلئے اوران پر طرح طرح کی سختیاں کیں۔ اس زمانہ میں بنی اسرائیل میں کوئی نبی موجود نہ تھے خاندان نبوت میں صرف ایک بی بی باقی رہی تھیں جو حاملہ تھیں ان کے ہاں بیٹے کی ولادت ہوئی جن کا نام شمویل رکھاگیا جب وہ بڑے ہوئے تو انہیں توریت کا علم حاصل کرنے کیلئے بیت المقدس میں ایک بزرگ عالم کے سپرد کیا گیا۔ وہ آپ علیہ الصلوۃ والسلام کے ساتھ بڑی شفقت کرتے اور آپ کواپنا بیٹا کہتے۔ جب حضرت شمویل علیہ الصلوۃ والسلام بلوغت کی عمر کو پہنچے تو ایک رات آپ اس عالم کے قریب آرام فرما رہے تھے کہ حضرت جبریل علیہ السلام نے اسی عالم کی آواز میں ’’ یا شمویل‘‘ کہہ کر پکارا آپ عالم کے پاس گئے اور فرمایا کہ آپ نے مجھے پکارا ہے۔ عالم نے اس خیال سے کہ انکار کرنے سے کہیں آپ ڈر نہ جائیں یہ کہہ دیا کہ بیٹا! تم سوجاو پھر دوبارہ حضرت جبریل علیہ السلام نے اسی طرح پکارا اور حضرت شمویل علیہ الصلوۃ والسلام عالم کے پاس گئے۔ عالم نے کہا کہ بیٹا! اب اگر میں تمہیں پھر پکاروں تو تم جواب نہ دینا۔ چنانچہ تیسری مرتبہ میں حضرت جبرئیل علیہ السلام ظاہر ہوگئے اور انہوں نے بشارت دی کہ اللہ تعالی نے آپ کو نبوت کا منصب عطا فرمایا ہے لہذا آپ اپنی قوم کی طرف جائیے اور اپنے رب تعالی کے احکام پہنچائیے۔ جب آپ علیہ الصلوۃ والسلام قوم کی طرف تشریف لائے توانہوں نےاپ علیہ الصلوۃ والسلام کو نبی ماننے سے انکار کردیا اور کہا کہ آپ علیہ الصلوۃ والسلام اتنی جلدی کیسے نبی بن گئے اچھا اگر آپ علیہ الصلوۃ والسلام نبی ہیں تو ہمارے لیے ایک بادشاہ مقرر کریں۔ (خازن البقرۃ تحت الایۃ: ۲۴۶ ۱ / ۱۸۶) جب قوم کی اعتقادی اور عملی حالت خراب ہو تو کیا ہوتا ہے اس واقعے سے یہ بھی معلوم ہوا کہ جب قوم کی اعتقادی اور عملی حالت خراب ہوجاتی ہے تو ان پر ظالم و جابر قوموں کو مسلط کردیا جاتا ہے۔ اس ایت کو سامنے رکھ کر پوری دنیا کے مسلم ممالک کی اعتقادی و عملی حالت کو دیکھا جائے تو اوپر کا نقشہ بڑا واضح طور پر نظر ائے گا۔قران کے اس طرح کے واقعات بیان کرنے کا مقصد صرف تاریخی واقعات بتانا نہیں بلکہ عبرت و نصیحت حاصل کرنے کی طرف لانا ہے۔ {ابعث لنا ملكا: ہمارے لئے بادشاہ مقرر کردیجئے۔} جب بنی اسرائیل نے حضرت شمویل علیہ الصلوۃ والسلام سے کہا کہ اپ ہمارے لئے بادشاہ مقرر کردیجئے تاکہ ہم راہ خدا میں جہاد کریں تو حضرت شمویل علیہ الصلوۃ والسلام نے فرمایا کہ ایسا نہ ہو کہ تم پر بادشاہ مقرر کیا جائے تو تم جہاد کرنے سے انکار کردو اور منہ پھیرو ۔ اس پر قوم نے جذبات میں اکر کہا کہ یہ کیسے ہوسکتا ہے کہ ہم جہاد سے منہ پھیریں جبکہ قوم جالوت نے ہماری قوم کے لوگوں کو ان کے وطن سے نکالا ہے ان کی اولاد کو قتل کیا ہے ان کی نسلوں کو تباہ کیا ہے۔ یہ سن کرحضرت شمویل علیہ الصلوۃ والسلام نے بارگاہ الہی میں دعا کی اور اللہ تعالی نے ان کی درخواست قبول فرماتے ہوئے ان کے لیے ایک بادشاہ مقرر کردیا اور انہیں جہاد کا حکم دیا لیکن بعد میں وہی ہوا جس کا اندیشہ اللہ تعالی کے نبی نے ظاہر فرمایا تھا یعنی بنی اسرائیل کی ایک بہت معمولی تعداد یعنی اہل بدر کے برابر صرف تین سو تیرہ افراد جہاد کیلئے تیار رہے اور بقیہ سب نے منہ پھیر لیا۔ (جمل البقرۃ تحت الایۃ: ۲۴۶ ۱ / ۳۰۱-۳۰۲) بزدل قوموں کا وطیرہ: یاد رکھیں کہ نعرے مارنے میں اگے اگے ہونا اور عملی میدان میں پیٹھ دکھا دینا بزدل قوموں کا وطیرہ ہے اور کامل لوگ گفتار کے نہیں بلکہ کردار کے غازی ہوتے ہیں۔