Surah Al Imran Ayat 78 (3:78)

{و ان منهم لفریقا: اور یقیناان اہل کتاب میں سے کچھ وہ ہیں۔} یہودیوں کے بارے میں فرمایا کہ’’ وہ توریت پڑھتے ہوئے گڑبڑ کرتے ہیں اور اپنی طرف سے کچھ مفہوم ملا کراس انداز میں پڑھتے ہیں کہ لوگ سمجھیں کہ یہ بھی اللہ عزوجل کا کلام ہے حالانکہ وہ کتاب اللہ کا حصہ نہیں ہوتا۔ یہ تاثر دینے کے ساتھ بعض اوقات صراحت بھی کردیتے ہیں کہ یہ اللہ عزوجل کا کلام ہے حالانکہ یہ صریح جھوٹ ہوتا ہے۔ اج کل بھی ایسے لوگ دیکھے ہیں جو توحیدکی ایتیں پڑھ کر انبیاء علیہم الصلوۃ والسلام اور اولیاء رحمۃاللہ تعالی علیہم کی شان کا انکار کرتے ہیں اور یہ تاثر دیتے ہیں کہ یہ شان انبیاء علیہم الصلوۃ والسلام کا انکار بھی قران میں ہے حالانکہ یہ صریح جھوٹ ہے۔ یونہی بہت سے لوگوں کو سود پردے اسلامی سزاوں اور دیگر کئی چیزوں کے بارے میں کلام کرتے سنا ہے وہ بھی قران پڑھتے ہیں اور درمیان میں اصل اسلامی احکام میں رد و بدل کرتے ہوئے اپنی بات اس انداز میں شامل کرتے ہیں کہ سننے والا سمجھے کہ شاید یہ بھی قران میں ہی ہے حالانکہ یہ واضح طور پر دھوکہ اور فریب ہوتا ہے۔