Surah Fatir Ayat 13 (35:13)

{یولج الیل فی النهار: وہ رات کو دن میں داخل کردیتا ہے۔} اس ایت کا خلاصہ یہ ہے کہ اللہ تعالی رات کے کچھ حصے کوکسی موسم میں دن میں داخل کردیتا ہے تو دن بڑھ جاتا ہے اور دن کے کچھ حصے کو کسی موسم میں رات میں داخل کردیتا ہے تورات بڑھ جاتی ہے یہاں تک کہ بڑھنے والی رات یا دن کی مقدار پندرہ گھنٹے تک پہنچتی ہے اور گھٹنے والا نو گھنٹے کا رہ جاتا ہے ۔اور اللہ تعالی نے سورج اور چاند کو کام میں لگادیا ان میں سے ہر ایک مقررہ میعاد یعنی روز قیامت تک چلتا رہے گا کہ جب قیامت آجائے گی تو ان کا چلنا موقوف ہوجائے گا اور یہ نظام باقی نہ رہے گا ۔یہی اللہ تعالی تمہارا رب ہے جو معبود ہونےرب اور مالک ہونے کے تمام اوصاف کا جامع ہے تو تم اسے پہچانواس کی وحدانیت کا اقرار کرو اور اس کے حکم کی اطاعت کرو اور اللہ تعالی کی بجائے جن بتوں کو تم پوجتے ہو ان کی بے بسی کا حال یہ ہے کہ وہ کھجور کے چھلکے کی مقدار بھی تمہیں نفع نہیں پہنچا سکتے ۔( روح البیان فاطر تحت الایۃ: ۱۳ ۷ / ۳۳۲ مدارک فاطر تحت الایۃ: ۱۳ ص۹۷۴ ملتقطا) نوٹ:رات کو دن میں داخل کرنے کی تفسیر سورہ ال عمرانایت نمبر27اور سورج چاند کو مسخر کرنے کی تفسیر سورہ رعد ایت نمبر2 اورسورہ ابراہیم ایت نمبر33میں بھی گزر چکی ہے۔