Surah An Nisa Ayat 47 (4:47)

{یایها الذین اوتوا الكتب:اے کتاب والو!} یہاں یہودیوں سے خطاب ہے کہ اے اہل کتاب! ہم نے قران اتارا ہے جو تمہارے پاس موجود کتاب یعنی توریت کی تصدیق کرنے والا ہے اس پر ایمان لے او ورنہ ایسا نہ ہو کہ ہم تمہارے چہرے سے آنکھ ناک کان ابرو وغیرہ مٹا کرتمہاری شکلیں بگاڑ دیں اور تمہارے چہرے کو اگے سے بھی ایک ایسی کھال کی طرح کردیں جیسے سر کا پچھلا حصہ ہوتا ہے کہ اس میں نہ انکھیں رہیں نہ ناک منہ وغیرہ اور یا ان یہودیوں پر بھی ہم ایسے ہی لعنت کریں جیسے ہفتہ کے دن نافرمانی کرنے والے یہودی گروہ پر لعنت کی گئی تھی۔ لعنت تو یہودیوں پر ایسی پڑی کہ دنیا انہیں ملعون کہتی ہے۔ اس ایت کے متعلق مفسرین کے چند اقوال ہیں : بعض کہتے ہیں کہ یہ وعید دنیا کے اعتبار سے ہے اور بعض اسے اخرت کے اعتبار سے قرار دیتے ہیں نیز بعض کہتے ہیں کہ لعنت ہوچکی ہے اور وعید واقع ہوگئی ہے اور بعض کہتے ہیں ابھی انتظار ہے۔ بعض کا قول ہے کہ چہرے بگڑنے کی یہ وعید اس صورت میں تھی جبکہ یہود یوں میں سے کوئی ایمان نہ لاتا اور چونکہ بہت سے یہودی ایمان لے آئے اس لئے شرط نہیں پائی گئی اور وعید اٹھ گئی۔ حضرت عبداللہ بن سلام رضی اللہ تعالی عنہ کا قبول اسلام: حضرت عبداللہ بن سلام رضی اللہ تعالی عنہ جو بہت بڑے یہودی عالم تھے انہوں نے ملک شام سے واپس آتے ہوئے راستے میں یہ آیت سنی اور اپنے گھر پہنچنے سے پہلے اسلام لا کرنبی کریم صلی اللہ تعالی علیہ والہ وسلم کی خدمت میں حاضر ہوئے اور عرض کیا: یا رسول اللہ !میں نہیں خیال کرتا تھا کہ میں اپنا منہ پیٹھ کی طرف پھر جانے سے پہلے اور چہرے کا نقشہ مٹ جانے سے قبل آپ کی خدمت میں حاضر ہوسکوں گا یعنی اس خوف سے انہوں نے ایمان لانے میں جلدی کی کیونکہ توریت شریف سے انہیں آپ صلی اللہ تعالی علیہ والہ وسلم کے رسول برحق ہونے کا یقینی علم تھا۔ (خازن النساء تحت الایۃ: ۴۷ ۱ / ۳۹۰-۳۹۱) حضرت کعب احبار رضی اللہ تعالی عنہ کا قبول اسلام: حضرت کعب احبار رضی اللہ تعالی عنہ جو علماء یہود میں بڑی قدرومنزلت رکھتے تھے انہوں نے ایک رات کسی شخص سے یہی ایت سنی تو خوفزدہ ہوئے اور حضرت عمر فاروق رضی اللہ تعالی عنہ کی بارگاہ میں حاضر ہوکر مسلمان ہو گئے۔ (فتوح الشام ذکر فتح مدینۃ بیت المقدس ص۲۳۴-۲۳۵ الجزء الاول)