Surah Al Maidah Ayat 48 (5:48)

{و انزلنا الیك الكتب: اور ہم نے اپ کی طرف کتاب نازل فرمائی۔} تورات و انجیل کا تذکرہ کرنے کے بعد اب قران عظیم کا تذکرہ ہورہا ہے۔ چنانچہ ارشاد فرمایا کہ اے حبیب ! صلی اللہ تعالی علیہ والہ وسلم ہم نے تمہاری طرف سچی کتاب اتاری جوسابقہ انبیاء علیہم الصلوۃ والسلام پر نازل ہونے والی کتابوں کی تصدیق کرتی ہے اور ان پر نگہبان ہے تو جب اہل کتاب اپنے مقدمات میں آپ صلی اللہ تعالی علیہ والہ وسلم کی طرف رجوع کریں تو آپ صلی اللہ تعالی علیہ والہ وسلم قرآن پاک کے مطابق ان کے درمیان فیصلہ فرمادیں۔ {لكل جعلنا منكم شرعة و منهاجا:ہم نے تم سب کے لیے ایک ایک شریعت اور راستہ بنایا ہے۔} ارشاد فرمایا کہ ہم نے تم سب کے لیے ایک ایک شریعت اور راستہ بنایا ہے یعنی فروعی اعمال ہر ایک کے خاص اور جدا جدا ہیں جیسے نمازوں روزوں کی تعداد اور اس طرح کے احکام جدا جدا ہیں لیکن اصل دین سب کا ایک ہے یعنی توحید و رسالت عقیدہ اخرت یونہی بنیادی اخلاقیات سب کی مشترک ہیں۔ حضرت علی المرتضی کرم اللہ تعالی وجہہ الکریم نے فرمایا کہ ایمان حضرت آدم علیہ الصلوۃ والسلام کے زمانہ سے یہی ہے کہ ’’ لآالہ الااللہ‘‘ کی شہادت اور جو اللہ عزوجل کی طرف سے آیا اس کا اقرار کرنا جبکہ شریعت ہر امت کی خاص ہے۔(خازن المائدۃ تحت الایۃ: ۴۸ ۱ / ۵۰۱) {و لو شآء الله لجعلكم امة واحدة: اور اگر اللہ چاہتا تو تم سب کو ایک ہی امت بنادیتا۔} ارشاد فرمایا کہ اگر اللہ تعالی چاہتا تو تم سب کو ایک ہی امت بنادیتا مگر اس نے ایسا نہیں کیاتا کہ جو شریعتیں اس نے تمہیں دی ہیں ان میں تمہیں آزمائے اور امتحان میں ڈالے تاکہ ظاہر ہوجائے کہ ہر زمانہ کے مناسب جو احکام دیئے کیا تم ان پر اس یقین و اعتقاد کے ساتھ عمل کرتے ہو کہ ان کا اختلاف اللہ تعالی کی مشیت(مرضی) سے ہے اور اس میں بہت سی حکمتیں اور دنیاوی اور اخروی فوائد و منافع ہیں اور یا تم حق کو چھوڑ کر نفسانی خواہشات کی پیروی کرتے ہو۔ (ابو سعود المائدۃ تحت الایۃ: ۴۸ ۲ / ۵۱) {فاستبقوا الخیرت: تو نیکیوں کی طرف دوسروں سے اگے بڑھ جاو۔} قران پاک کا حکیمانہ طریقہ یہ ہے کہ جن معاملات سے انسان کی دنیا و اخرت کا کوئی قابل قبول فائدہ متعلق نہیں ہے ان میں بحث و مقابلہ کرنے کی بجائے انہیں رضائے الہی اور بھلائی کے کاموں میں مقابلہ کرنے کی دعوت دیتا ہے۔ چنانچہ یہاں بھی اسی انداز کی ایک جھلک ہے کہ شریعتوں کے اختلاف کی وجوہات میں فلسفیانہ بحثیں کرنے اور بال کی کھال اتارنے کی بجائے نیکیوں کی طرف انے کی دعوت دی۔ اس میں ہماری بہت سی چیزوں کی اصلاح ہے۔ اج کل حالت یہ ہے کہ ہر محاذ اور میدان میں فضولیات پر بحث و مباحثہ اور پانی سے مکھن نکالنے کی کوششیں جاری رہتی ہیں اور کرنے کے کاموں کی طرف توجہ کم ہی ہوتی ہے۔ خواہ مخواہ کی باریکیاں نکالنے کو مہارت اور قابلیت شمار کیا جاتا ہے اگرچہ عملی طور پر ایسے ادمی کی حالت نہایت گری ہوئی ہو۔ بحث وہاں کی جائے جہاں اس سے کوئی فائدہ نظر ائے صرف وقت گزاری لوگوں کو متوجہ رکھنے طلب شہرت اور قابلیت دکھانے کیلئے اپنا اور لوگوں کا وقت ضائع کرنااور عملی دنیا میں تنکا تک نہ توڑنا عقل دین اور اسلام سب کے منافی ہے۔ اس نصیحت کی روشنی میں بہت سے لوگوں کو اپنے طرز عمل پر نظر کرنے کی حاجت ہے۔ سمجھنے کیلئے سرکار دو عالم صلی اللہ تعالی علیہ والہ وسلم کا ایک فرمان ہی کافی ہے’’من حسن اسلام المرء ترکہ مالایعنیہ‘‘ ادمی کے اسلام کے حسن سے ہے کہ وہ فضول چیزوں کو چھوڑ دے۔(ترمذی کتاب الزہد ۱۱-باب ۴ / ۱۴۲ الحدیث: ۲۳۲۴)