Surah Al Maidah Ayat 52 (5:52)

{فترى الذین فی قلوبهم مرض: تو جن کے دلوں میں مرض ہے تم انہیں دیکھو گے۔} مسلمانوں کو تو فرمادیا گیا کہ یہودونصاری سے دوستی نہ کرو لیکن منافقین کے بارے میں فرما دیا کہ ان کی یہودونصاری سے دوستیاں بڑی مستحکم ہیں کیونکہ یہ دل کے مریض ہیں اور تم انہیں دیکھو گے کہ یہود و نصاری سے دوستی کرنے میں دوڑے جاتے ہیں اور ان لوگوں کی نظر میں ان سے دوستی کرنے کا فائدہ یہ ہے اور اپنی زبان سے بھی یہ کہتے ہیں کہ اگر کبھی حالات بدل جائیں مسلمان مغلوب اور کافر غالب ہوجائیں تو کفار سے دوستی لگانا انہیں اس وقت فائدہ دے گا۔ لیکن یہ سب منافقت کی وجہ سے تھا کیونکہ رسول اکرم صلی اللہ تعالی علیہ والہ وسلم اسلام کے غلبے کی جو باتیں فرماتے تھے انہیں اس پر یقین نہیں تھا ورنہ اگر ان باتوں پر یقین ہوتا تو ڈٹ کر اسلام کی حمایت کرتے۔ اللہ تعالی بشارت دیتا ہے کہ قریب ہے کہ وہ مسلمانوں کو فتح عطا فرمائے اور اپنے رسول محمد مصطفی صلی اللہ تعالی علیہ والہ وسلم کو کامیاب و کامران فرمائے اور ان کے دین کو تمام دینوں پر غالب کردے اور مسلمانوں کو ان کے دشمن یہود و نصاری و غیرہ کفار پر غلبہ دیدے چنانچہ یہ خبر سچ ثابت ہوئی اور اللہ تعالی کے کرم سے مکہ مکرمہ اور یہودیوں کے علاقے فتح ہوئے۔(خازن المائدۃ تحت الایۃ: ۵۲ ۱ / ۵۰۳) اس ایت میں پہلی بات تو یہ ارشاد فرمائی تھی کہ اللہ تعالی فتح لے ائے اور دوسری بات یہ ارشاد فرمائی گئی اللہ تعالی اپنی طرف سے کوئی خاص حکم لے ائے جیسے سرزمین حجاز کو یہود یوں سے پاک کرنا اور وہاں ان کا نام و نشان باقی نہ رکھنا یا منافقین کے راز کھول کر انہیں رسوا کرنا۔(خازن المائدۃ تحت الایۃ: ۵۲ ۱ / ۵۰۳-۵۰۴ جلالین المائدۃ تحت الایۃ: ۵۲ ص۱۰۲ ملتقطا) تو جب اللہ تعالی اپنا وعدہ پورا فرمائے گا اس وقت منافقین اپنی منافقت پر یا اس خیال پر نادم ہوجائیں گے کہ سرور دوعالم صلی اللہ تعالی علیہ والہ وسلم کفار کے مقابلہ میں کامیاب نہ ہوں گے۔