Surah Yusuf Ayat 80 (12:80)

{فلما استایـٴـسوا منه:پھر جب وہ بھائی اس سے مایوس ہوگئے ۔} یعنی جب وہ بھائی حضرت یوسف علیہ الصلوۃ والسلام کی طرف سے مایوس ہو گئے اور انہیں اس بات کا یقین ہو گیا کہ بنیامین واپس نہیں ملیں گے توسب بھائی لوگوں سے ایک طرف ہو کر کھڑے ہو گئے اور اپس میں مشورہ کرنے لگے کہ اب اپنے والد صاحب کے پاس کیا منہ لے کر جائیں گے اور اپنے بھائی بنیامین کے بارے میں کیا کہیں گے۔ ان میں سے علم و عقل یا عمر میں جو بھائی بڑا تھا وہ کہنے لگا ’’کیا تمہیں معلوم نہیں کہ تمہارے والد حضرت یعقوب علیہ الصلوۃ والسلام نے تم سے اللہ تعالی کا عہد لیا تھا کہ تم اپنے بھائی کو واپس لے کر جاو گے اور اس سے پہلے تم نے حضرت یوسف علیہ الصلوۃ والسلام کے معاملے میں کوتاہی کی اور اپنے والد سے کئے ہوئے عہد کی پاسداری بھی نہ کی۔ میں تو مصر کی سرزمین سے ہر گز نہ نکلوں گا اور نہ ہی اس صورت حال میں مصر چھوڑوں گا یہاں تک کہ میرے والد مجھے مصر کی سرزمین چھوڑنے کی اجازت دے دیں اور مجھے اپنے پاس بلا لیں یا اللہ تعالی میرے بھائی کو خلاصی دے کر یا اس کو چھوڑ کر تمہارے ساتھ چلنے کامجھے کوئی حکم فرما دے اور وہ سب سے بہتر حکم دینے والا ہے۔(خازن یوسف تحت الایۃ: ۸۰ ۳ / ۳۷ مدارک یوسف تحت الایۃ: ۸۰ ص۵۴۱ ملتقطا)