Surah Ad Dukhan Ayat 15 (44:15)

{انا كاشفوا العذاب قلیلا: ہم کچھ دنوں کیلئے عذاب دور کرنے والے ہیں ۔} اس ایت میں کفار مکہ سے فرمایا جا رہا ہے کہ جیسے ہی ہم تم سے کچھ دنوں کے لئے عذاب دور کردیں گے تم پھر اسی شرک کی طرف لوٹ جاو گے جس پر اس سے پہلے قائم تھے ۔اس سے مقصود یہ تنبیہ کرنا ہے کہ وہ لوگ اپنے عہد کو پورا نہیں کریں گے کیونکہ ان کا حال یہ ہے کہ جب کسی مصیبت کی وجہ سے عاجز ہو جاتے ہیں تو اللہ تعالی کی بار گاہ میں گڑگڑاتے ہیں اور جب ان کا خوف اور مصیبت دور ہو جاتی ہے تو اپنے کفر اور اباء واجداد کی اندھی پیروی کی طرف پلٹ جاتے ہیں ۔( تفسیرکبیر الدخان تحت الایۃ: ۱۵ ۹ / ۶۵۸ ملخصا) چنانچہ حضور پر نور صلی اللہ تعالی علیہ والہ وسلم کے صدقے ان کی مصیبت دور ہو جانے کے بعد ایسا ہی ہو اکہ وہ لوگ ایمان نہ لائے اور اپنے شرک و کفر پر ہی قائم رہے۔