Surah Taha Ayat 85 (20:85)

{قال:فرمایا۔} اللہ تعالی نے حضرت موسی علیہ الصلوۃ والسلام کو خبر دیتے ہوئے ارشاد فرمایا کہ اے موسی!علیہ الصلوۃ والسلام ہم نے تیرے پہاڑ کی طرف آنے کے بعد تیری قوم جنہیں آپ نے حضرت ہارون علیہ الصلوۃ والسلام کے ساتھ چھوڑا ہے کو ازمائش میں ڈال دیا اور سامری نے انہیں بچھڑا پوجنے کی دعوت دے کر گمراہ کردیا ہے۔( روح البیان طہ تحت الایۃ: ۸۵ ۵ / ۴۱۳ خازن طہ تحت الایۃ: ۸۵ ۳ / ۲۶۰ ملتقطا) سبب کی طرف نسبت کرنا جائز ہے: اس آیت میں اضلال یعنی گمراہ کرنے کی نسبت سامری کی طرف فرمائی گئی کیونکہ وہ اس کا سبب اور باعث بنا تھا۔ اس سے ثابت ہوا کہ کسی چیز کو اس کے سبب کی طرف منسوب کرنا جائز ہے اسی طرح یوں کہہ سکتے ہیں کہ ماں باپ نے پرورش کی دینی پیشواؤں نے ہدایت کی اولیاء کرام رحمۃ اللہ تعالی علیہم نے حاجت روائی فرمائی اور بزرگوں نے بلا دفع کی ۔