Surah Al Qasas Ayat 38 (28:38)

{و قال فرعون: اور فرعون نے کہا۔} حضرت موسی علیہ الصلوۃ والسلام نے فرعون کو جو اللہ تعالی کی وحدانیت پر ایمان لانے اور صرف اسی کی عبادت کرنے کی دعوت دی تھی ا س کا انکار کرتے ہوئے فرعون نے اپنے دربار میں موجود لوگوں سے کہا: اے درباریو!میں تمہارے لیے اپنے سوا کوئی خدا نہیں جانتا جس کی تم عبادت کرو۔پھر اس نے اپنے وزیر ہامان سے کہا کہ اے ہامان!میرے لیے گارے پر اگ جلا کر اینٹ تیار کرو پھر میرے لئے ایک انتہائی اونچا محل بناو شاید میں موسی کے خدا کو جھانک لوں اور بیشک میں توموسی کو اپنے اس دعوے میں جھوٹوں میں سے ہی سمجھتا ہوں کہ اس کا ایک معبود ہے جس نے اسے اپنا رسول بنا کر ہماری طرف بھیجا ہے ۔ فرعون نے یہ گمان کیا تھا کہ (معاذ اللہ) اللہ تعالی کے لئے بھی مکان ہے اور وہ جسم ہے کہ اس تک پہنچنا اس کے لئے ممکن ہو گا اس لئے اس نے ہامان کو عمارت بنانے کا حکم دیا اور اپنے ارادے کا اظہار کیاچنانچہ ہامان نے فرعون کے حکم پر عمل کرنے کے لئے ہزارہاکاریگر اور مزدور جمع کئے اینٹیں بنوائیں اور تعمیراتی سامان جمع کر کے اتنی بلند عمارت بنوائی کہ دنیا میں اس کے بر ابر کوئی عمارت بلند نہ تھی۔ کہتے ہیں کہ دنیا میں سب سے پہلے اینٹ بنانے والا ہامان ہے یہ صنعت اس سے پہلے نہ تھی۔(خازن القصص تحت الایۃ: ۳۸ ۳ / ۴۳۳ مدارک القصص تحت الایۃ: ۳۸ ص۸۷۱ ملتقطا)