Surah Az Zukhruf Ayat 38 (43:38)

{حتى اذا جآءنا: یہاں تک کہ جب وہ کافر ہمارے پاس آئے گا۔} یعنی قران سے منہ پھیرنے والے کفار شیطان کے ساتھی ہوں گے یہاں تک کہ جب قیامت کے دن ان میں سے ہر ایک اپنے ساتھی شیطان کے ساتھ ہمارے پاس ائے گا تووہ شیطان کو مخاطب کر کے کہے گا:اے میرے ساتھی! اے کاش! میرے اور تیرے درمیان اتنی دوری ہو جائے جتنی مشرق و مغرب کے درمیان دوری ہے کہ جس طرح وہ اکٹھے نہیں ہو سکتے اور نہ ہی ایک دوسرے کے قریب ہو سکتے ہیں اسی طرح ہم بھی اکٹھے نہ ہوں اور نہ ہی ایک دوسرے کے قریب ہوں اورتو میرا کتنا ہی برا ساتھی ہے۔( جلالین مع صاوی الزخرف تحت الایۃ: ۳۸ ۵ / ۱۸۹۵-۱۸۹۶) حضرت سعید جریری رضی اللہ تعالی عنہ فرماتے ہیں ’’مجھے یہ روایت پہنچی ہے کہ قیامت کے دن جب کافر کو اس کی قبر سے اٹھایا جائے گا تو شیطان اس کا ہاتھ تھام لے گاوہ شیطان اس کے ساتھ ہی رہے گا یہاں تک کہ اللہ تعالی دونوں کو جہنم میں جانے کا حکم فرما دے گااس وقت کافر کہے گا: اے کاش! میرے اور تیرے درمیان مشرق و مغرب کے برابر دوری ہوجائے توتو کتنا ہی برا ساتھی ہے۔(تفسیرطبری الزخرف تحت الایۃ: ۳۸ ۱۱ / ۱۸۹)