Surah Qaf Ayat 15 (50:15)

{افعیینا بالخلق الاول: تو کیا ہم پہلی بار بنانے کی وجہ سے تھک گئے} اس صورت کی ابتدا میں یہ بیان کیا گیا تھا کہ کفار مکہ مرنے کے بعد دوبارہ زندہ کئے جانے کا انکار کرتے ہیں اور اب یہاں سے ان منکروں کے انکار کا جواب دیاجارہاہے کہ کیا ہم پہلی بار بنانے کی وجہ سے تھک گئے ہیں جس کی وجہ سے دوبارہ پیدا کرنا ہمارے لئے دشوار ہے ہم تھکے ہر گز نہیں بلکہ وہ لوگ موت کے بعد پیدا کئے جانے سے متعلق شبے میں ہیں ۔( تفسیرکبیر ق تحت الایۃ: ۱۵ ۱۰ / ۱۳۳ خازن ق تحت الایۃ: ۱۵ ۴ / ۱۷۶ ملتقطا) کفار مکہ کی انتہائی جہالت: کفار مکہ اس بات کا اقرار کرتے تھے کہ مخلوق کو اللہ تعالی نے پیدا کیااس کے باوجود وہ اس بات کو محال اور بعید سمجھتے ہیں کہ اللہ تعالی مخلوق کو دوبارہ پیدا فرمائے گا۔یہ ان کی کمال جہالت تھی کیونکہ ایجاد کے مقابلے میں دوبارہ بنانا ظاہرنظر میں زیادہ اسان ہے اور یہ لوگ ایجاد پر تو قدرت مان رہے ہیں اور اس سے زیادہ اسان پر قدرت کا انکار کر رہے ہیں ۔