مجھے قیامت کے دن کی قسم ہے۔

اور مجھے اس جان کی قسم ہے جو اپنے اوپر ملامت کرے۔

کیا آدمی یہ سمجھتا ہے کہ ہم ہرگز اس کی ہڈیاں جمع نہ فرمائیں گے۔

کیوں نہیں ہم اس بات پر قادر ہیں کہ اس کے انگلیوں کے پوروں (تک) کو ٹھیک کردیں ۔

بلکہ آدمی چاہتا ہے کہ وہ اپنے آگے کو جھٹلائے۔

پوچھتا ہے :قیامت کا دن کب ہوگا؟

توجس دن آنکھ دہشت زدہ ہوجائے گی۔

اور چاندتاریک ہوجائے گا۔

اور سورج اور چاند کو ملا دیا جائے گا۔

اس دن آدمی کہے گا: بھاگنے کی جگہ کہاں ہے؟

ہرگز نہیں ،کوئی پناہ نہیں ہوگی۔

اس دن تیرے رب ہی کی طرف جاکر ٹھہرنا ہے۔

اس دن آدمی کو اس کا سب اگلا پچھلا بتادیا جائے گا۔

بلکہ آدمی خود ہی اپنے حال پر پوری نگاہ رکھنے والا ہوگا ۔

اگرچہ اپنی سب معذرتیں لا ڈالے ۔

تم یاد کرنے کی جلدی میں قرآن کے ساتھ اپنی زبان کو حرکت نہ دو۔

بیشک اس کا جمع کرنا اور اس کا پڑھنا ہمارے ذمہ ہے۔

تو جب ہم اسے پڑھ لیں تو اس وقت اس پڑھے ہوئے کی اتباع کرو۔

پھر بیشک اسے بیان فرمانا ہمارے ذمہ ہے۔

خبردار! بلکہ (اے کافرو!) تم جلد جانے والی کوپسند کرتے ہو۔

اور آخرت کو چھوڑتے ہو۔

کچھ چہرے اس دن تر و تازہ ہوں گے۔

اپنے رب کو دیکھنے والے ہوں گے۔

اور کچھ چہرے اس دن بگڑے ہوئے ہوں گے۔

سمجھتے ہوں گے کہ ان کے ساتھ پیٹھ توڑ دینے والا سلوک کیا جائے گا ۔

ہاں ہاں ، جب جان گلے کو پہنچ جائے گی۔

اور کہا جارہا ہوگا کہ جھاڑ پھونک کرنے والا کون ہے؟

اور وہ سمجھ لے گا کہ یہ جدائی کا وقت ہے۔

اور پنڈلی سے پنڈلی لپٹ جائے گی۔

اس دن تیرے رب ہی کی طرف چلنا ہوگا ۔

تو کافر نے نہ تو تصدیق کی اور نہ نماز پڑھی۔

ہاں جھٹلایا اور منہ پھیرا۔

پھر اپنے گھر والوں کی طرف اکڑتا ہوا چلاگیا۔

تیرے لئے خرابی ہے پھر خرابی ہے ۔

پھر تیرے لئے خرابی ہے پھر خرابی ہے ۔

کیا آدمی اس گھمنڈ میں ہے کہ اسے آزاد چھوڑ دیا جائے گا۔

کیا وہ اس منی کا ایک قطرہ نہ تھا؟ جو گرایا جاتا ہے ۔

پھر خون کا لوتھڑا ہوگیاتو پیدا فرمایا پھر ٹھیک بنایا۔

تو اس سے مرد اور عورت کی دو قِسمیں بنائیں ۔

کیا جس نے یہ سب کچھ کیا وہ مردوں کو زندہ کرنے پر قادر نہیں ہے؟