اللہ کے نام سے شروع جو نہایت مہربان ، رحمت والاہے ۔

تارے کی قسم،جب وہ اترے۔

تمہارے صاحب نہ بہکے اورنہ ٹیڑھا راستہ چلے۔

اور وہ کوئی بات خواہش سے نہیں کہتے۔

وہ وحی ہی ہوتی ہے جو انہیں کی جاتی ہے۔

انہیں سخت قوتوں والے ، طاقت والے نے سکھایا ،

پھر اس نے قصد فرمایا۔

اس حال میں کہ وہ آسمان کے سب سے بلند کنارہ پر تھے۔

پھر وہ جلوہ قریب ہوا پھر اور زیادہ قریب ہوگیا۔

تو دو کمانوں کے برابر بلکہ اس سے بھی کم فاصلہ رہ گیا۔

پھر اس نے اپنے بندے کو وحی فرمائی جو اس نے وحی فرمائی۔

دل نے اسے جھوٹ نہ کہا جو (آنکھ نے) دیکھا۔

تو کیا تم ان سے ان کے دیکھے ہوئے پر جھگڑ تے ہو۔

اور انہوں نے تو وہ جلوہ دوبار دیکھا۔

سدرۃ المنتہیٰ کے پاس۔

اس کے پاس جنت الماویٰ ہے۔

جب سدرہ پر چھا رہا تھا جو چھا رہا تھا۔

آنکھ نہ کسی طرف پھر ی اور نہ حد سے بڑھی۔

بیشک اس نے اپنے رب کی بہت بڑی نشانیاں دیکھیں ۔

تو (اے لوگو!) کیا تم نے لات اور عزیٰ دیکھا۔

اور ایک اور تیسری منات کو۔

کیا تمہارے لئے بیٹا اور اس کیلئے بیٹی ہے۔

جب تو یہ غیر منصفانہ تقسیم ہے۔

یہ تو صرف چند نام ہیں جوتم نے اور تمہارے باپ دادا نے رکھ لیے ہیں اللہ نے ان (کی حقانیت) پرکوئی سند نہیں اتاری، وہ تو نرے گمان اور نفس کی خواہشوں کے پیچھے لگے ہوئے ہیں حالانکہ بیشک ان کے پاس ان کے رب کی طرف سے ہدایت آچکی ہے۔

کیا انسان کو ہر وہ چیزحاصل ہے جس کی اس نے تمنا کی؟.

تو آخرت اور دنیا سب کا مالک اللہ ہی ہے۔

اور آسمانوں میں کتنے ہی فرشتے ہیں کہ ان کی سفارش کچھ کام نہیں آتی مگر جبکہ اللہ اجازت دیدے جس کے لیے چاہے اور پسند فرمائے۔

بیشک آخرت پر ایمان نہ رکھنے والے فرشتوں کے عورتوں جیسے نام رکھتے ہیں ۔

اور انہیں اس کا کوئی علم نہیں ،وہ تو صرف گمان کے پیچھے ہیں اور بیشک گمان یقین کی جگہ کچھ کام نہیں دیتا۔

تو تم اس سے منہ پھیر لو جو ہماری یادسے پھرا اور اس نے صرف دنیاوی زندگی کو چاہا۔

یہ ان کے علم کی انتہا ہے ۔بیشک تمہارا رب اسے خوب جانتا ہے جو اس کی راہ سے بہکا اور وہ خوب جانتا ہے جس نے ہدایت پائی۔

اور اللہ ہی کا ہے جو کچھ آسمانوں میں ہے اور جو کچھ زمین میں ہے ،تا کہ برائی کرنے والوں کو ان کے اعمال کا بدلہ دے اور نیکی کرنے والوں کو نہایت اچھا صلہ عطا فرمائے۔

وہ جو بڑے گناہوں اور بے حیائیوں سے بچتے ہیں مگر اتنا کہ گناہ کے پاس گئے اور رک گئے بیشک تمہارے رب کی مغفرت وسیع ہے، وہ تمہیں خوب جانتا ہے جب اس نے تمہیں مٹی سے پیدا کیا اور جب تم اپنی ماؤں کے پیٹ میں حمل کی صورت میں تھے تو تم خود اپنی جانوں کی پاکیزگی بیان نہ کرو، وہ خوب جانتا ہے اسے جو پرہیزگار ہوا۔

تو کیا تم نے اسے دیکھا جو پھر گیا۔

اور اس نے تھوڑا سا مال دیا اور روک رکھا۔

کیا اس کے پاس غیب کا علم ہے تو وہ دیکھ رہا ہے۔

یاکیا اسے اس کی خبر نہیں دی گئی جو موسیٰ کے صحیفوں میں ہے۔

اور ابراہیم کے جس نے (احکام کو) پوری طرح ادا کیا۔

۔(وہ بات یہ ہے) کہ کوئی بوجھ اٹھانے والی جان دوسری کا بوجھ نہیں اٹھائے گی۔

اور یہ کہ انسان کیلئے وہی ہوگا جس کی اس نے کوشش کی۔

اور یہ کہ اس کی کو شش عنقر یب دیکھی جائے گی۔

پھر اسے اس کا بھرپور بدلہ دیا جائے گا۔

اور یہ کہ بیشک تمہارے رب ہی کی طرف انتہا ہے۔

اور یہ کہ وہی ہے جس نے ہنسایااور رلایا۔

اور یہ کہ وہی ہے جس نے موت اور زندگی دی۔

اور یہ کہ اسی نے نر اور مادہ دو جوڑے بنائے۔

نطفہ سے جب اسے ڈالا جائے۔

اور یہ کہ دوبارہ زندہ کرنااسی کے ذمہ ہے۔

اور یہ کہ وہی ہے جس نے غنی کیا اور قناعت دی۔

اور یہ کہ وہی شعریٰ (نامی ستارے) کا رب ہے۔

اور یہ کہ اسی نے پہلی عاد کو ہلاک فرمایا۔

اور ثمود کو تو اس نے (کسی کو) باقی نہ چھوڑا۔

اور ان سے پہلے نوح کی قوم کو (ہلاک کیا) بیشک وہ ان (دوسروں ) سے بھی زیادہ ظالم اور سرکش تھے۔

اور اس نے الٹنے والی بستیوں کو نیچے گرایا۔

پھر ان بستیوں کو اس نے ڈھانپ لیاجس نے ڈھانپ لیا۔

تو اے بندے! تواپنے رب کی کون کون سی نعمتوں میں شک کرے گا؟

یہ پہلے ڈر سنانے والوں میں سے ایک ڈر سنانے والے ہیں ۔

قریب آنے والی (قیامت) قریب آگئی۔

اللہ کے سوا اسے کوئی کھولنے والا نہیں۔

تو کیا اس بات پر تم تعجب کرتے ہو؟

اور ہنستے ہو اور روتے نہیں ہو۔

اور تم غفلت میں پڑے ہوئے ہو۔

تو اللہ کے لیے سجدہ کرواور عبادت کرو۔